河南建業請道士喺球場開壇作法求轉運，結果真係拎到3個月以來第1場主場勝仗，但其實迷信呢家嘢唔止喺中超，球壇每個角落都有，非洲嗰邊更加係最多。

其中比較為人熟悉嘅，就係2010南非世盃開幕前，呢支東道主特登擇咗個吉日，請咗一位喺祖魯族享負盛名嘅巫師嚟到進行首場分組賽嘅球場，當場宰殺咗一隻公牛，然後將牛血灑在龍門位置附近，然後仲將牛血搽咗喺門將觀尼嘅額頭上，連佢件波衫都有，結果首戰果然就畀佢哋1:1賽和墨西哥，只不過係咪巫術起到作用，喺分組賽後就好多人都唔相信，因為佢哋最終只係得第三，同當時將帥不和嘅法國一齊出局。

另外，去年年尾盧旺達有場聯賽，由Mukura Victory對Rayon Sports，客軍Rayon Sports疑施巫術，喺門柱附近貼咗咒符，令Mukura Victory點攻都唔入，又中柱又中楣，結果Mukura Victory前鋒Moussa Camara發現事有蹊蹺，下半場走去搣咗門柱隔離個符咒，Rayon Sports球員眼見巫術被破，即追打Moussa Camara，結果球證亦向佢出示黃牌，但換來係Mukura Victory終於入到對方，場波踢成1:1。非洲足協因呢件事後亦立例，凡係發現有球隊喺比賽中落巫術，就會罰款。