國內宏調未完，上周五晚歐美股市向下，港股短期偏淡，但市場錢多，有心人亦唔少，只會有小調整，唔怕有大調整。正股有平貨，買C輪。總之溢價太高嘅C輪，咪亂買，否則做鷓鴣（俾人㩒嗰隻）或水魚，冇人可憐，輸錢重要唔好意思講畀人聽。
建行C輪4556：建行（939）過去19個交易日，有5次跌到3.35元即刻止咳，彈番上，期內最高價3.60元，上周五收3.40元。再試3.35元有可能，準備買C輪博反彈。正路之選係4556。隻輪10月3日到期，輪價24.4仙，溢價3.7%，槓桿率13.9倍（有效9.2倍），引伸波幅27.4%。

滙控C輪4956：滙控（005）上周五收137.20元，1周升幅1.60元。上周五ADR回落，滙控難免亦會軟番啲，但唔易回到1個星期前個位，吼住喺136元左右，撈啲C輪。
其中1隻可以諗嘅係4956，9月尾到期，輪價46仙，溢價1.7%，槓桿率29.8倍（有效18.1倍），引伸波幅14.7%。滙控本月31日宣布中期業績，估計派第2中期息每股15美仙，並在4956到期前除息，所以實際溢價約2.9%，唔算特別平，炒賣宜快手快腳。
長實C輪3622：長實（001）收83.15元，吼低見82元買C輪3622。隻輪10月初到期，輪價38仙，溢價3.5%，槓桿率21.9倍（有效13倍），引伸波幅20.5%。
章盛