《深宮計》裡面太平公主（陳煒飾）嘅近身，要守得秘密，亦要心腸夠毒。秦槐喺劇中絕對係well done。但飾演此角嘅李美慧，性格同秦槐好唔同。

前落港姐，浮沉無綫多年（十二年），代表作除了有《深宮計》之秦槐，應該就係嫁個有錢人——曾文豪。

今日有周刊就搵咗李美慧專訪做封面人物，就係「分析」佢「如何嫁個有錢人」。消化完曾太嘅個人經驗，綜合成以下重點：

1.越有錢嘅人越聰明而且唔易埋身。
2.越係想嫁有錢人，有錢人越係防你。
3.唔好工於心計啦。李美慧話，曾文豪就係鍾意佢夠真夠自然。
4.唔好化咁濃妝
5.有時蠢蠢地都幾好，由對方做你嘅「百科全書」
6.當互有好感，知道大家都有意思發展，就要表明態度，互釋疑慮。唔好估估下。

當然，以上只係李美慧個人經歷，講唔上係教路。但佢點樣嫁入曾家，都幾曲折離奇。之前提到嗰個朋友飯局，曾李兩人唔係一齊坐，李美慧自言都唔知對方係邊個，飯局完後李亦北上拍劇一個月。後來在朋友牽線下去東龍島行山，先至開始接觸。嗰陣曾文豪同佢講想搵個伴，李美慧仲好熱心介紹女仔佢識添！點知曾文豪鍾意嗰個，原來係李美慧囉。

富商追女仔嘅手法都幾TVB喎。