張衞健(Dicky)胞弟張衞彝（Henry）最近又控訴大佬張衞健無情無義，追討佢作為經理人嘅20%佣金，今日仲發手寫聲明兼喺上水朋友屋企開記招。

張衞彝之前指出佢喺93至06年期間，任Dicky經理人達13年，兩人齊齊成立經理人公司，各持一半股權，但Henry聲稱佢哋係二八分帳，張衞健八成張衞彝兩成。06年張衞彝患上抑鬱症後同Dicky決裂，佢仲話Dicky喺佢意識迷糊之下叫佢簽下大批文件，將公司4000萬現金轉去做定期再買樓，每個月只係畀返3萬蚊佢做生活費。

張衞彝嘅手寫聲明有幾點，第1點強調唔想外間再稱佢為「張衞健細佬」，要尊重佢作為經理人嘅專業。第2點佢話多年來瞓身幫張衞健開拓中港台市場，更多次捨棄好多外面待遇更好嘅工作。第3，佢話多年來Dicky6年來多次拒絕歸還佢應有嘅佣金，近日亦未有回應佢，希望佢喺一星期內歸還。