咖啡店變「國泰專門店」！良心老闆請大批前空勤：預咗蝕本
蘋果日報 2020/12/07 17:30
Holly Brown國泰咖啡店請人
國泰航空大舉向5,300名香港員工派「大信封」，這家香港人的航空公司不復再現。空服飛行夢碎，降落到地面重新開始。有良心咖啡店即使在疫情夾擊下，仍大量聘請國泰員工，現時超過70%員工均為國泰人，更特意加長營運時間，讓員工「有工可返」。老闆徐奕基（Raymond）指，國泰曾是香港標誌性的航空公司，以優質服務見稱，是次裁員與員工能力無關，「我唔會覺得係我幫佢哋，係佢哋幫緊我」。不為噱頭，只為請得幾多得幾多。
記者 盧珮瑤
咖啡店Holly Brown的招牌，在中環士丹利街別樹一幟。除了因奪目的波波燈，還有招牌上的三個「C」字：「Cabin Crew」（機艙服務員）和「Coffee」（咖啡）。看似風馬牛不相及的兩組字，在這間店舖巧妙地融合。一切由老闆Raymond對國泰之情說起。
良心老闆一家為國泰忠粉
Raymond自小移民澳洲，直至1997年回流香港做生意。2010年由金融界躍身飲食業，創立咖啡店Holly Brown。雖然從未從事航空業，他對國泰的情意結，就在兩地走的時候開始，「無論你係咪住喺香港，定好似我咁細個移民咗去外國，每次返嚟香港都係飛國泰，係一個首選嘅航空公司」。
Raymond指，他的父親更是每年均會乘坐國泰回港，即使年紀漸漸老邁，家人仍放心讓他自己獨自乘坐國泰航班，「就算90歲我哋都好放心，佢（父親）都成日喺我面前讚國泰照顧得佢好好」。他形容國泰員工做事「好快手」，所有突發事件亦能輕鬆應付，「例如漏咗嘢喺機場嘅cafe lounge（咖啡廳休息室），你同佢哋講，就算飛機就快起飛，佢哋真係會好盡力幫你處理到」。
中環士丹利街的Holly Brown咖啡店，新招牌貼上「Cabin Crew Coffee」的字樣，象徵當中大多員工均是國泰前空勤。林幸泉攝。
預咗蝕本照請人 全店七成員工屬「國泰人」
曾受國泰空服所助，讓心愛物品失而復得，在國泰人無助時期，Raymond作為僱主亦希望伸出援手，「呢班員工要離職，並唔係因為佢哋做得唔好」。他遂於fb發招聘告示，隨即收到不少回應，更堅持會親自為每個人面試。
「我唔會覺得我係幫佢哋，話唔定係佢哋幫返我」。Raymond認為，國泰人除了工作能力高，其專業服務態度亦非常符合飲食業，「啲Crew（機艙服務員）質素好，又有學歷，亦都識點同客人對話，好多方面都幫到我」。在新聘請的國泰人中，其中一位員工Yusky曾修讀時裝設計，Raymond更讓他設計出新制服，「睇得出佢哋好multi-talented（多才多藝）」。
現時全店28名員工，除了廚師和部份全職員工，超過20人是國泰或港龍的前員工，是真正的「國泰專門店」。Raymond指，以往店中只有數名員工，現時為了讓員工「有工可返」，更特意加長營業時間至早市。在疫情之下，飲食業亦面臨困境，人人開源節流之際，他卻選擇逆流而上，只為請得幾多得幾多，「預咗蝕本」。
Raymond指，自己曾由金融界轉到飲食業發展，亦由澳洲回流香港，他深明「重新適應」4個字背後有多困難，「轉一個新環境、新工作要時間適應，呢個我明，但我相信無咩會難倒佢哋，因為……香港人就係咁樣㗎啦」。
咖啡店老闆Raymond指，雖然「預咗蝕本」，仍然希望盡量聘請更多國泰員工，亦非常欣賞國泰員工的能力。林幸泉攝。
Holly Brown於2010年創立，一直與香港人擁有相同理念。林幸泉攝。
Raymond非常欣賞各員工的不同能力，更讓其中一位修讀時裝設計的前空勤為咖啡店設計新制服，發揮所長。受訪者提供圖片。
狂send CV零見工機會 國泰前空姐：其他公司覺得你落到地乜都唔識
「拉花真係好難！」，但Yuko邊笑說邊輕鬆在牛奶咖啡上，拉出一顆心型圖案，這才剛是她上班的第二周，職位是餐廳主管。
在這10年，Yuko都在國泰任職機艙服務員，早一陣子裁員消息已滿天飛，「我都有諗過係咪裁自己」。一語成讖，她屬於被裁的5,300人之一，「當時唔開心咗一兩個鐘，然後都好快諗自己要做啲咩」。
比裁員更殘酷的，反而是尋找工作的過程。Yuko指，自己較喜歡面對客人，故特意尋找餐飲、顧客服務範疇的工作，更漁翁撒網地發送至少20份履歷表，仍換不到一個面試機會。這時，她才發現很多公司並不欣賞空中服務員的技能，「有啲公司會覺得，你飛嘅經驗唔係咩經驗，你落到地就乜都唔識」。她指，有舊同事更在尋找工作時，被公司以電郵斷然拒絕，「會話『你哋唔好再send CV過嚟，好多人apply（申請），我係唔會請你哋』，我會覺得點解你要咁樣抹殺我哋能力？」。
後來Yuko在被裁的同事群組中，發現到Holly Brown的招聘便毅然一試。她笑言，加入餐廳後有重投社會之感，加上相比以往空姐上班時間，現時每周要連續工作6日，體力消耗亦較大。不過，新工作卻給予她最寶貴的自由，「我有咩諗法我可以講，唔會驚講出嚟之後會有咩事、會唔會俾人炒」。
國泰前空姐Yuko指，加入咖啡店後感受到自由表達意見的可貴，「唔使再驚講完俾人炒」。林幸泉攝。
港龍前空姐：希望開分店請晒所有舊同事
國泰裁員的同日，國泰港龍航空亦即時停運，「我用咗3日時間先接受到呢個係事實」，任職國泰港龍前機艙高級事務長近25年的Mon，道出那刻晴天霹靂的感受。
「完全無估過，一覺瞓醒，見到公司啲App（應用程式）唔見晒，之後就收到通知話我哋停止運作，決定解散」，Mon坦言，自己從20歲起從事航空業，更認為這份工作「會做一世」。突然被失業，她躲起來靜思，又不敢上社交網絡與同事接觸。然而，因她背負養家的責任，經過黑暗三天後，亦決定開始尋找工作，幸好很快遇上了Holly Brown。現時同樣剛上班兩個星期，職位是店舖的主管培訓生。
「我飛咗20幾年，20幾年嚟其實個世界變得好快，我覺得我累積嘅顧客服務同執生技巧，用喺地下嘅餐飲業係幾好」。作為資深員工，談到國泰人或空服的特質，Mon指是「團隊精神」，「我哋最講求呢樣嘢，唔會分界線，你做呢樣嘅、我就做嗰樣嘅，唔會咁，見到邊度未搞掂就會合作做埋佢」。除了工作，連願景都相當有「團隊」概念，談到將來目標，她笑言希望同事一起努力，讓老闆多開幾間分店，「請返晒我哋所有舊同事返嚟！」。
曾任職國泰港龍航空空服近25年的Mon指，當天收到公司停運消息晴天霹靂，用了3日時間才能接受現實。林幸泉攝。
一班前空勤，由國泰英文名稱「Cathay」的「C」字，降落到「Cabin Crew Coffee」的世界，重新起飛。我們失去了香港的航空公司，不過，令港人引以為傲的國泰員工其實從未消失，專業服務精神依舊，絲絲入扣。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！