官恩娜（Ella）、佘詩曼、狄易達等噚日喺山頂出席「點滴揹水行慈善活動」，雖然現場天雨路滑，但懷孕4個月嘅Ella，唔單止照着厚底運動鞋，仲堅持同其他嘉賓一樣，唔擔遮冒雨主持儀式。
今年母親節對Ella嚟講有更深感受，佢話一早就收到好多祝賀，開始感受到做媽媽嘅感覺。被問到老公有冇表示？佢即刻錫住老公話：「未呀！佢平時工作好忙，今日係假期，朝早我起身時佢仲休息緊。」Ella又自爆上圍升Cup咗好多，要換過晒啲內衣褲：「都未試過咁勁，𠵱家要慢慢接受身體轉變，我喺屋企沖涼照鏡時，睇到鏡中嗰個都唔似自己，老公都係咁講。」佢仲話打算搵妹妹幫佢影大肚寫真。

阿佘拒提鄭嘉穎

另外，曾經同鄭嘉穎傳過緋聞嘅佘詩曼，對於呢位舊緋聞男友近日被指同陳凱琳撻着咗，唔知佢點睇嘉穎段新戀情呢？阿佘似乎好避忌，亦好唔想講呢單戀情，好冷漠咁話：「唔講啦！上次答咗。」不過當同佢講第二樣話題時，阿佘就變得好樂意喇！佢話下個月可以一家人去旅行休息吓，問佢係咪順便放假拍拖，佢就話自己仲係單身冇拖拍。
撰文：馮仁昭