上月52歲生日嘅吳君如，雖然同男友陳可辛飛嚟飛去拍戲又拍劇，不過佢哋同囡囡陳是知關係唔錯，有時間就會同囡囡行孖咇，又會帶是知去外地旅行歡渡親子時光。

其實君如寶貝女是知今年已經11歲，就快踏入青春反叛期，媽咪當然緊張又擔心，仲有指佢因為擔心阿女會拍拖，不時check吓佢個電話，睇吓佢最近同邊啲朋友玩得埋。

不過小朋友去到呢個歲數，父母管得太嚴就會適得其反，越管越反抗，太過放任唔理咩，又驚佢識到壞朋友，耳濡目染有樣學樣，所以父母學懂點拿揑收放真係好重要。

囡囡交朋結友冇得管，做父母只可以開導，但話晒阿女開學，衣食住行嘅嘢，做媽咪嘅君如當然會做到妥妥貼貼。噚日(2日)，《蘋果》記者就見到君如一個人喺利園二樓童裝名店shopping，見君如專注喺一間鞋舖打躉，一輪狂風掃落葉下，望望櫃枱，戰利品已經疊到山咁高，有返學皮鞋同波鞋，目測君如最少買咗6對鞋俾囡囡，最後君如以黑卡埋單，然後極速拎住個大膠袋，急步行去停車場。

再見君如嗰陣，佢已經坐咗喺今年2月先落地嘅寶馬新車司機位上，然後揸車直駛返半山寓所。

君如錫囡囡就梗㗎啦，不過冇帶阿女去試款，就一次過買咁多對鞋，如果阿女一句話唔鍾意，咪弊！