政壇上個禮拜發生唔少事，先係公民黨禍不單行，主席關信基講六四俾人鬧，跟住個網頁又俾人整蠱；然後又輪到煲呔要同民建聯發展特別關係，夜訪民建聯中委（爭在冇過埋夜），再搵肥龍去東莞，同民建聯開房交心。
公民黨嘅湯家驊（Ronny）上星期去咗日本睇櫻花，結果都係離唔開政圈，身處東瀛都有人問：「究竟公民黨嘅六四立場係乜？」
Ronny話，星期二上機前睇鬼報，先發現竟然有個鬼佬專欄作者，將獅子山學會愚人節搞嘅公民黨假網頁當真，於是即刻畀個email佢澄清。呢位老外都知衰咗，即刻同佢講對唔住。至於獅子山學會嘅負責人就同Ronny哋講，今次玩笑開大咗，但學會就冇錢喇，告都冇得賠㗎！

返港打高球　為大狀開齋

原本以為去日本唔使理香港，但Ronny喺大阪一落機，即刻有個同機嘅港人問佢關信基單嘢，搞到Ronny要同呢位仁兄解釋，其實主席唔係咁意思，佢哋對六四嘅睇法好堅定，只係六四唔一定話要列入黨綱云云。
但最令佢谷氣嘅，係煲呔竟然去民建聯中委度奉承，Ronny話佢喺日本上網睇報紙先知有啲咁嘅事，真係好鬼肉酸，失晒特首風度。如果煲呔係要黐埋去民建聯度，就應該光明正大畀特首入黨，唔好限制特首要冇政黨背景。
香港政治令Ronny冇眼睇，所以佢一返到香港冇耐，就去打哥芙。咁啱噚日係律師盃比賽，由大律師公會對律師會，呢項比賽由○一年開始搞，打咗六年，大狀終於贏到律師。Ronny話，成個公民黨得佢一個鍾意打哥芙，其他大狀都唔識、亦唔鍾意打，所以佢只好孤軍作戰。


爆料熱線：29290000、27860099
報料傳真：26239278
報料電郵：[email protected]