不論人數多少，老董與中央唔睬你就唔睬你，所以拗人數實在冇乜意思。大家唔信，睇吓一位通常反映強硬保守派意見嘅梁立人先生點寫。佢篇專欄（七月七日經濟日報）題為「百萬群蟻」話：「其實二十萬和五十萬並沒有太大的差別，若遊行目標正確，即使兩三千人亦足夠。若只是為發洩對現實的不滿，追逐政治利益為實，則雖百萬人亦不過烏合之眾，中央政府見慣大場面，絕不會為上街人數眾多而改變人大常委決定。到頭來必如諸葛亮所言：『吾視曹操百萬之眾，如群蟻耳！但我一舉手，則皆為虀粉矣！』」
諸葛亮之言，出自《三國演義》內之「諸葛亮舌戰群儒，魯子敬力排眾議」，諸葛亮激嬲咗孫權，孫權拂衣而起，魯肅鬧孔明，於是孔明有此一言，即係睇唔起曹操百萬烏合之眾，如強弩之末，勢不能穿魯縞，一嘢就打瓜佢啦！
所以呢，無論幾多人上街，人哋都自視為孔明，視我哋如螞蟻，吹吹乎！條氣唔順，大可聯群結隊，拉攏親戚朋友、左鄰右里，齊齊喺九月十二號去投票，認住邊個會係蟻民一分子，睇吓到時係自認孔明多吖，還是螞蟻多？