第十二屆亞洲電影大獎頒獎禮將於今晚七點半喺澳門威尼斯人度假村酒店舉行。

今屆競爭一如以往咁激烈，而大會今年另設四個特別獎項用以表揚個別電影工作者對亞洲電影嘅貢獻，分別係由張艾嘉獲得終身成就獎、惠英紅獲頒卓越亞洲電影人大獎、2017年最高票房亞洲電影大獎《戰狼2》，以及今晚會頒發嘅亞洲電影大獎飛躍新星獎，提名方面，香港代表古天樂憑《殺破狼．貪狼》成為影帝大熱，而影后方面有《鳥獸行》嘅蒼井優、《相愛相親》張艾嘉、《情今以後》金敏喜、《喜歡．你》周冬雨等，戰況激烈，另外最佳新演員方面，南韓少女時代嘅成員林允兒亦在其中。

今晚嘉賓陣容星光熠熠，雲集電影界中唔少重量級人馬，包括程小東、劉嘉玲、張艾嘉、杜琪峯、許鞍華、馮小剛、劉偉強、古天樂、曾志偉、吳京、張晉、毛舜筠、林心如、鄧麗欣、姜皓文等等中港台電影人。

下午約五點半，已經有各地電影人陸續到場，包括郭子健導演、鄭思傑導演、趙式慶等。

精選娛聞，喺晒《娛果》
http://fb.com/appledailyent