英國大隻男星亨利卡維（Henry Cavill）喺3年前嘅《超人：鋼鐵英雄》（Man of Steel）開始扮演超人，演呢位正義英雄演得入型入格。為咗迎接聖誕節，亨利去咗買聖誕樹，今日仲公開咗一張自己單手舉起聖誕樹嘅相，不過睇真啲，其實傍邊係有大型機器吊住棵樹，亨利只係借位影咗張相啫。

亨利拍完《蝙蝠俠對超人：正義曙光》（Batman v Superman）之後，佢正忙緊超英晒冷嘅《正義聯盟》（Justice League），之後有指華納兄弟仲會開拍《超人：鋼鐵英雄》續集，相信亨利短期之內仍然會忙住演超人。