任期僅得4個月的財政司司長陳茂波甫上任就鬧出豪裝財政司司長官邸，曾入住政務司司長官邸的林鄭月娥稱不太知道維修工程內容，「如果你話漏水剝落石屎，咁真係要做，邊個入去住，都要做」，但她指若非必需改動，就應等任期有幾年的官員作出修改決定。

被問到有否修葺過官邸時，稱過去只做過很少量工程，包括增建一條「石板路仔」，因為過去招待賓客時發現門外花園全是草地，「你知女士有時著高踭鞋，嗰度又好濕，一踩落草地成腳都係泥，整污人地啲地毯，所以我舖咗條石板路」。至於有沒有到訪過財政司司長官邸時，林鄭即指：「我好耐、好耐無去過財政司長官邸，佢（曾俊華）無請我食飯嘛」，但她自己則邀請過譚志源到政務司司長官邸食飯十幾廿次。

林鄭又自爆，政務司司長官邸主人房浴室花灑「唔掂」，「有時好慢一條線，有時好大，由於水壓不同，令熱水恒溫不同，有時熱到沖唔到，有時就係凍水」，但她仍然「算數」，希望官邸能在長時間無人居住時才作出維修，笑指「呢間屋係1951年同埋好舊款，我懷疑有啲喉有啲問題，可能要兩、三個月無人住，要折牆先整到」，陳志雲則笑稱，「但你知嗰度有廁紙？」，林鄭則尷尬笑說：「嗰度有廁紙」。

問到一旦當選特首會否入進禮賓府，林鄭表明：「梗係會，唔係住邊度？」，稱自己置業「梗係有困難」，「我一筆過長俸，喺灣仔買唔到300呎」，她完全明白置業困難影響很多年輕人士，特別是想結婚生子的香港人，「居住環境搞唔掂，個心好唔舒服」。

林鄭又指不算太熟悉禮賓府，過去都是去做招呼應酬，只認識一些宴會廳和食飯地方，「出面好似有種嘢，但我唔係好識種嘢」。問到會否要求風水師為禮賓府看風水，林鄭則自爆：「我諗多年來睇過晒，呢啲官邸間間都睇過，因為有一次蔡伯勵嚟我VH（政務司司長官邸）嗰度探我，佢話『我睇過晒，你呢度風水好好』」。至於禮賓府是否都需要修葺，林鄭稱交由工程人士決定，個人「無乜要求」，而且兒子目前並不在香港，不會搬入禮賓府。至於丈夫林兆波會否陪同入住禮賓府，林鄭則未有回應，只稱丈夫一直都在香港，「不過佢好少蒲頭，一蒲咗好慘，佢話變咗公眾人物」。林鄭指，不知道丈夫成為公眾人物後「係咪都幾好享受」。她稱曾有市民在灣仔星街「拉住佢，問『係咪林生？』問佢係咪林鄭老公」，但大部分市民都好親切，有人更向林兆波稱：「多謝你老婆，多謝你咁支持你老婆」。