（新增內容）想當年出寫真彈起嘅周秀娜，着內衣影相似食生菜，身材勻稱嘅佢，12年做投資做埋賣內衣生意。當時佢投資咗7位數、約800萬人民幣，同La Miu合作，推出名為「秀娜系列」嘅性感內衣，專攻大陸少女市場。

首次做老闆嘅娜姐，出錢出力，憑32D、22、32驕人三圍做生招牌拍宣傳相，而且訂價唔係好貴，每套約賣200蚊人仔，據知當日內衣剛上架一日，網購都多達逾萬份訂單。

娜姐當日做老闆時，信心十足，亦好緊張呢盤生意，會幫手設計同畀意見，喺13年接受訪問時仲話生意額理想，單喺嗰年1111「光棍節」，大陸網上營業額單日已有500萬人仔。

不過呢，有網民發現，娜姐賣bra網店竟然上唔到，一上就係彈出因欠費而被終止所有伺服器及其網絡運作。《蘋果》今日聯終娜姐求證，她以短訊回覆：「兩年前已結束合作，所以也不清楚狀況，不方便給予回應。現在只有演藝工作，沒有其他範疇的生意。」

周秀娜稱兩年前已結束合作，即2016年。而事有湊巧，16年7月，本報收到一位自稱是去年9月開始在周秀娜內衣公司Laanaa工作的員工，指公司經常遲出糧，原定每個月7日出糧，卻每每諸多藉口，遲兩三天薪金才存入銀行戶口，不少員工表示不滿。當時周秀娜回應稱：「問咗partner，公司冇拖糧或欠薪事件，唔知點解會有咁樣嘅嘢傳出嚟。」未知與結束合作是否有關。（新聞連結：　 https://bit.ly/2JdjbBG　）

精選娛聞，喺晒《娛果》
http://fb.com/appledailyent