《蘋果》娛樂節目《關你影視》，結合影評、電影資訊，同你開住Live講戲。啱啱播出嘅呢集，再次請來電影導演郭子健（Derek）做嘉賓。Derek係忠實嘅漫畫迷，亦係蜘蛛俠粉絲，估唔到世間上竟然有部蜘蛛俠電影可以令佢瘋狂大讚：「近幾年除咗《CoCo》之外，得呢部有震撼人心嘅感覺，呢套係另一套我睇完出嚟扎札跳嘅。」

Derek除咗特別鍾意電影嘅繪畫風格，更鍾意個故事：「頭半個鐘頭，每幾分鐘就有個驚喜，然而喺咁驚喜不斷嘅過程入面，睇到最尾竟然係感動，你話幾咁難得！」佢仲笑指戲中嘅中年Peter Parker，最能講中佢嘅中年心事：「Peter Parker同Mary Jane一段對話，我感動到熱淚盈眶，老淚縱橫，唔使宣傳啦呢個戲下話？」

佢仲表示，上一部可以用嚟釐訂做朋友標準嘅，已經係神作《蝙蝠俠: 夜神起義》：「上一次我話邊個話《Dark Knight》唔好睇，我哋唔好做朋友喇！今次我可以話《蜘蛛俠：跳入蜘蛛宇宙》呢套戲，如果邊個話唔好睇呢，我哋唔好傾偈喇！」咁郭子健嘅朋友要留意返喇。

精選娛聞，喺晒《娛果》
http://fb.com/appledailyent