城鎮化講咗兩三個月，當初大家驚死買唔切，嗱嗱臨炒一轉內房、水泥股，之後越諗越唔對路，覺得阿爺冇理由放水搞多嚿類似「4萬億」嘅蘇州屎，轉而認為消費、服務類股份有運行，不過呢啲行業競爭劇烈，打市佔率防衞戰都未嚟得切，點有能力講增長？諗諗吓就發覺真正受惠城鎮化嘅行業未必咁多，其中一個受惠板塊應該係中高端醫藥股。
內地醫療需求大、供應小，城鎮化提升農民生活，命仔變得更值錢，有錢食藥醫病，藥品需求進一步增加。不過，唔同類型嘅藥品，尤其生產門檻低嘅就會面對劇烈競爭，因此要揀有track record嘅股，晉佳就揀行業競爭力強嘅羅欣藥業（8058）。

羅欣主要生產呼吸同消化系統藥品，好處係盈利長期穩中有升，無論中央限制藥價，市場點競爭都好，收入盈利始終穩定，舊年首3季分別係1.3億、1.13億同1.2億元人民幣，表現落差唔大，收入分別係4.74億、5.31億同6.1億元人民幣，增速明顯加大，純利率則由第一季嘅27.4%跌到19.7%。
羅欣一早解釋第3季利潤率下跌，因衞生部頒佈嘅《抗菌藥物臨床應用管理辦法》舊年8月開始生效，將抗菌藥物分為非限制、限制及特殊使用級，其中羅欣有10個產品喺唔同省份被列為限制使用級或特殊使用級，影響旗下抗菌藥銷售及毛利率，公司將會開發新產品去減輕上述問題帶嚟嘅影響。
不過，睇番反映上述《辦法》推行兩個月嘅第三季業績，表現又唔係太差，所以未來唔需要太擔心羅欣業績，相信可以重返穩定增長嘅勢頭。
假設第四季業績受到上述《辦法》影響較大，只賺1億元人民幣，拉勻全年市盈率10.5倍，仍然合理。
羅欣股價舊年5月到𠵱家升咗一倍，返到10元嘅2010年密集阻力區，所以不妨等調整吸納，可以9.50元同9元分兩注吸納，中線首站睇2010年高位13蚊。

晉佳
本欄逢周一、三及五刊出