今晚仁濟慈善雙週慶功宴喺荃灣舉行，坤哥吳業坤，許廷鏗及李司棋等出席。

司棋姐受訪直言好慚愧，話最近做慈善工作唔多，不過之前都有參與去探一班公公婆婆嘅活動，佢話:「見到好可憐嘅人，我就好眼淺，有一次一個婆婆跌爛咗唯一一個可以娛樂自己嘅收音機，都忍唔住喊。」此時司棋姐真係喊出嚟要抹眼淚。

司棋姐話:「呢樣嘢都好醜，咁都忍唔住，當時拎晒身上搭車嘅錢幫啲公公婆婆，我係一個好少喊嘅人，但見到人哋慘，自己都忍唔住。」咁拍喊戲咪好容易?佢話:「都唔係O架，之前舞台劇喊戲，諗住主耶穌為自己釘十架，但做人應該諗多啲開心嘢，負面情緒好影響自己，會好易病，早年患癌時情緒都唔好。」

坤哥就遲咗少少到場，佢話:「因為頭先唔小心揸車有小小碰撞，不過冇撞到人，架車就揩花咗，揸車3年嚟第一次撞車，不過我哋都息事寧人。」咁係邊個錯?佢話:「應該我冇錯，對方亦冇特別追究，當破財擋災，想藉此提倡交通安全。」

許廷鏗就話:「之前同Fans都有參與義賣，嚟緊都想同Fans多啲去支持公益活動。」