35歲日本歌姬中島美嘉昨晚在台北國際會議中心開騷，佢以黃金女戰士裝扮性感登場，以《Fighter》一曲揭開序幕，當佢唱出《PASSION》時，美嘉靠近結他手，耳咪卻纏在結他弦上，佢索性鬆掉耳咪線，之後繼續表演，展現出道17年嘅執生技巧，讓2,800名粉絲拍手叫好。

美嘉相隔近兩年再踏上寶島舞台，呢次曲目完全為台迷度身訂造，佢圍上黑色紗裙以中文打招呼說：「大家好，我是中島美嘉。」希望全場粉絲享受到最後，緊接獻唱《ORION》、《最美好的自己》、《櫻花紛飛時》等一連串經典情歌。歌而優則演嘅美嘉於2005年在人氣電影《NANA》中飾演「大崎NANA」，今次亦唔少得演繹主題曲《Glamorous Sky》。論到最經典嘅首本名曲，美嘉於Encore時唱出代表作《雪之華》，全場揮舞手機燈海，令佢感動到一度哽咽，接住獻唱新歌《彩戀～SAI REN》、《Joy》為演唱會劃上句號，最後佢帶領團隊謝幕，在冇用米高峰下大喊：「謝謝！」同時跪地鞠躬致謝，誠意十足。

美嘉今次台灣之行甫抵埗即直奔龍山寺，祈求演唱會成功，還抽到最好嘅大吉籤，仲有去食地道牛肉麵。適逢今年係《雪之華》推出15周年，佢下榻酒店特別獻上「冰封藍玫瑰蛋糕」祝賀，花上兩星期打造嘅心意，令美嘉驚喜萬分，也感謝酒店非常有心。

精選娛聞，喺晒《娛果》
http://fb.com/appledailyent