余曉彤(Hidy)今日喺柴灣，以中國及香港代言人身份為修身堂拍廣告，着咗條透視裙嘅佢大擺誘人甫士，佢話：「呢個係華麗公主造型，都幾性感，不過都係以靚為主。」問到酬勞方面，Hidy表示：「好好呀，我哋又講心又講金。」俾唔俾到豪宅首期﹖佢笑住話：「嘩！我哋今次有3年合作，食粥食飯都靠佢。」

熱愛運動嘅Hidy，身材向來窈窕，不過佢就唔多滿意，佢話：「我係鍾意做運動，不過磅數一直維持，幾多磅就唔講啦，但我啲骨同肌肉都重，今次做代言人，佢哋叫我做DNA測試，原來收身可以咁科學，用配對去睇我用咩療程同食咩食物，我可以任食開心果、栗子、火雞同羊肉，呢啲食物對我係會減磅，呢樣幾有趣，科學都可以瘦身，兩星期減咗10磅，o依家冇咁肌肉，出番女人嘅線條。」上圍有冇縮細﹖佢笑住話：「冇乜，好少，可能因為我背部瘦咗，所以cup數冇變過，我唔使重新買過內衣褲。」

此外，Hidy透露佢自己有份演出嘅電影《辣警霸王花2之不義之戰》喺4月尾上映，佢話：「之前睇咗片，好感動，因為今次我有好多發揮，除咗要打之外，仲要開槍，我開到手都震埋，因為啲槍好重。」

精選娛聞，喺晒《娛果》
http://fb.com/appledailyent