【新增回應】

金像電影《樹大招風》道具領班、人稱「道具全」嘅張偉全被控管有道具銀紙單案噚日審完，雖然只係判緩刑，但係電影業界已經譁然，紛紛表態。導演彭浩翔噚日已經呼召業界立法會代表馬逢國議員，希望搞完佢嗰幾條頭髮之後，就要幫業界處理問題(新聞連結： https://bit.ly/2JkKX2A )。

今日彭導套《低俗喜劇》其中一幕，又畀網民拎出嚟狂loop仲tag埋佢，話佢有先見之明用真錢拍戲喎。嗰幕講述電影人鄒凱光因為冇工開，所以扮拍賭片，實情係搞非法麻雀檔，當時有警察上嚟，鄒凱光指麻雀枱上係「道具銀紙」，警員問點解道具銀紙咁真，鄒凱光反駁：「拍出嚟假，又話我哋港產片唔認真。」呢個對白相當啜核。

彭浩翔喺佢fb回應：「朋友紛紛發來，其實我唔想成日做預言家。」

今日佢接受電話訪問時就話：「馬逢國議員識機管局高層，冇理由唔知係規矩同酌情之間點處理，佢應該好清楚，希望佢搞完嗰幾條頭髮快啲去處理。相信祖哥（張同祖）一班業界同相關人仕會同政府傾。拍戲唔會避呢啲鏡頭嘅，咪用支付寶拍囉。可惜全哥唔識金管局高層。」

講到有業界人仕係「道具全」出事之後，走去搵金管局申請想印道具銀紙，結果係唔批，彭浩翔都話搞唔清政府想點，仲分享咗金管局嘅回信，佢話：「申請唔緊要，你畀人知個程序，咪照做囉。現在申請又話唔批真係唔知想點。」佢話全哥單嘢完全冇犯罪意圖都拉，真係叫電影人唔知點做。

鄒凱光回應話:「當日拍嘅時侯，覺得做電影無工開，搞到咁已經仆街，但點都仆街唔過今日呢個地步，唔係電影無工俾你開，係有你敢唔敢開？ 打份工搵兩餐爭d搞到要坐監 咁不如偷呃拐騙 至少搵到五千萬，乜事都冇!」

精選娛聞，喺晒《娛果》 http://fb.com/appledailyent