市區 疫情 反覆加上近期天氣宜人，唔少市民都會選擇假日去郊野公園散心兼呼吸吓新鮮空氣。不過，未必每個人遠足前都會做足準備。2018年因旺角騷亂而遭重判7年的盧建民，早排就專登喺獄中寫信，好激動咁提醒 港人 行山要量力而為，因為最近每逢假期同周日，都會見到「送中服務隊」不停往返大嶼山，仲不時喺獄中上空飛過。佢仲話，千祈唔好誤信KOL同電視台嘅行山路線推介喎。

由盧建民創辦嘅Facebook專頁「影攝食」，最近就Post一張相信係盧本人寫嘅親筆信。盧喺信入面話，佢每逢星期日或公眾假期，都會喺塘福懲教所球場，望到又名「送中服務隊」嘅飛行服務隊直升機，不斷喺鳳凰山一帶盤旋，「究竟是甚麼人令到直升機如此頻繁地盤旋呢？原來就是一班沒有行山經驗的自私港人貢獻！」

盧之後憶述，未入獄前經常見到有人着拖鞋、牛仔褲，甚至高跟鞋、皮鞋、西裝等行山。佢又話，有啲人十年都未行過山，就學人行自殺崖、鳳凰山、「一線生機」呢啲實際上難度同風險同高嘅路線。佢又話，以前行山都會先上網查吓路線詳情同天氣，亦會帶足2.5公升以上嘅水、乾糧和得力素。

盧之後仲叫港人唔好亂信KOL、電視台嘅行山推介，因為呢班主持上山時都有專業人士幫佢哋準備一切。佢仲好激動咁鬧爆自私港人隨處掉 口罩 、紙巾，甚至飯盒，「究竟有沒有諗過誰人幫你們善後？又是一班無受薪的行山人士善後。自私的港人，你們有沒有羞愧之心？DLLM，請放過郊野啦！給山野休養生息的時間，好嗎？」

雖然語氣重咗啲，不過八方一諗起盧當日判刑時，曾經同另一被告講「幫我睇住 香港 ，好冇？」八方相信，盧即使喺獄中，都依然深愛呢個城市。所以咁多位 香港人 ，喺佢哋重獲自由前，不如一切幫佢哋「睇住香港」，愛惜郊野，好冇？

-----------------------------

《蘋果》英文版免費試睇： 了解更多

英文版已登錄《蘋果》App，立即 下載/ 更新 ： iOS / Android

-----------------------------

支持蘋果深度報道，深入社區，踢爆權貴，即Like 蘋果專題及調查組FB專頁 ！