有睇過電影《星球大戰》嘅，都應該知道入面嘅一位演員Mark Hamill，咁你又知唔知佢竟然係英冠狼隊嘅球迷？

Mark Hamill最為人熟悉嘅電影角色，當然係喺《星戰》入面扮演Luke Skywalker，咁呢位今年65歲嘅演員，又係咪真係狼隊嘅球迷呢？

話說早排Mark Hamill不停咁like咗一啲 #Wolves嘅Twitter推文，一個狼隊球迷組織嘅Twitter戶口就好搞笑咁問，到底天行者嘅真身會唔會係狼隊嘅球迷呢？勢估唔到呢個搞笑post會得到Mark Hamill嘅回應：「我依家係喇！直至兩日前我都未聽過呢隊波，就係因為我like咗狼隊球迷一個推文，佢哋就令到我有一家人嘅感覺喇，正呀喂！」

狼隊官方Twitter之後再回應Mark Hamill，話有天行者一齊真係不得了。跟住呢位演員再回覆：「之前問我係咪鍾意狼，我以為係講緊動物咋，但係大家都好興奮，咁我點可以唔做狼隊嘅球迷呢？家陣冇得返轉頭喇！」