走韓風嘅跳唱組合AsOne早喺2012年出道，上年初換血後，o依家成員包括隊長Shin、Nata、Chloe同Kayan，4位成員全部弱質纖纖，佢哋自爆平時好少做運動，可以話係手無搏雞之力，所以除咗唱歌練舞，佢哋之前齊齊去報名學以色列自衞術，希望可以學得一招半式防身，以備不時之需。

最近潮興玩格鬥MMA，但AsOne自問怕受傷冇膽試，隊長Shin話：「唔敢玩呀，見到都覺得好痛，同埋平時係少運動，突然間咁激應該應付唔到。」不過AsOne又想鍛煉體能，所以最終選擇咗學「以色列自衞術」，既可強身又可防身，遇上不法之徒都可以保護自己。

第一次上堂，AsOne4成員輪流扮演賊人同色魔角色，過程出現不少爆笑場面，而教練就分別教咗佢哋3個招式，包括「後方頸鎖防衞」、「側面頸鎖防衞」同「強姦位置掐頸防衞」。

第一招：後方頸鎖防衞（難度：☆☆☆）
經過教練一輪細心指導，Kayan、Chloe嘗試使出「後方頸鎖防衞」，將扮賊、從後箍住佢哋嘅Shin同Nata制服，過程包括先用手插佢哋眼，再用雙手緊住佢哋，然後再轉身甩開兩人嘅頸鎖，再從後將箍着自己嘅Kayan同Chloe反捉住，最後就係用膝頭反擊。對於Kayan、Chloe表現，教練認為初學算係好唔錯，但真正用到嘅時候就一定要加大力度。

第二招：側面頸鎖防衛（難度：☆☆）
隊長Shin繼續扮演不法之徒，從後襲擊Chloe，呢個時候Chloe聽教練指示用「側面頸鎖防衞」呢一招，反客為主，一手扯住Shin嘅頭髮，再極速轉身將Shin按喺地，然後揮拳還擊。

第三招：強姦位置掐頸防衞（難度：☆☆）
這一招難度雖不是最高，但教練認為對女孩子好有用，如果不幸遇上色魔，呢個「強姦位置掐頸防衞」動作好可能幫到你甩身。相中可見Nata畀扮色魔嘅Shin箍頸，再從上方壓住喺佢兩蹆之間，冇得走嘅情況下，Nata先用雙手捉緊Shin嘅手，再用力將身體一縮，調節一個對自己有利嘅姿勢，用腳狂踢Shin反擊。

採訪：草津
場地：FFG武術健身中心
教練：潘世顯（國際以色列自衞術聯盟香港區總教練）