韓國女神全智賢去年2月為老公崔俊赫誕下慈姑掟，今日再傳來好消息，宣佈目前懷上第二胎，現時懷孕10周，女神亦將停工安胎，今年內都唔會接拍新作品。對於女神全智賢再做媽咪，粉絲當然為女神感到開心，不過亦有人擔心全智賢生完第二胎後，有轉做全職主婦、淡出演藝界嘅可能。

其實全智賢生完第一胎、去年底復出接拍韓劇《藍海傳說》時已透露想為囝囝減產，當時佢就表示成為人母後人生優先次序已完全改變：「現時選擇工作時會更小心，會注意要點分配時間，要平衡價值同需要，我相信每個母親都跟我一樣，當離開孩子時會感到不安，好想花多啲時間跟囝囝一齊。」

而全智賢前年宣佈懷第一胎時，都仲有陀住B完成電影《復國者聯盟》嘅宣傳活動及挺巨肚現身公開活動，不過全智賢今次陀第二胎似乎更為小心，對上一次公開現身已係4月尾嘅事，似乎真係有大幅減產、專心做家庭主婦嘅可能。