當年今日
關於我們

【動畫●泡菜x榨菜】
過年着韓服拜黃大仙 港韓混血兒自嘲怪胎

蘋果日報 2017/05/26 00:00


尋找首爾的香港】「我屋企嘅女人都係棟起隻腳食飯!」90後Jade即場示範韓式餐桌禮儀--「棟起隻腳、晾起隻手」,仲有㗎,「飯碗要擺低,一定用匙羹食,餐餐都要食泡菜!」咪以為Jade係哈韓族,而係港韓混血兒,呢一切都喺韓籍媽咪身上學返嚟,仲笑住話,「爸爸係香港人,佢見我哋食飯咁粗魯都無辦法。」
empty
Jade係香港出世,土生土長嘅港韓混血兒,媽咪係韓國人,Jade講笑話:「全屋女人都棟起腳食飯!」
empty
仲有,飯碗要擺低,一定用匙羹食,餐餐都要食泡菜!
empty
Jade細細個就會着韓服,
empty
仲話媽咪試過叫佢着韓服去黃大仙拜神。
Jade喺香港出世,土生土長,聽Eason、霆鋒啲歌長大,當年韓風仲未襲港,未有少女時代、Super Junior、BigBang等令人為之瘋狂嘅K-Pop歌手,呢半個韓國人嘅身份,令Jade擁有不一樣的童年。

「怪胎」兩個字,Jade用嚟形容細個嘅自己,「身邊嘅人會問我好多奇怪問題,好似細個搵小學,有人聽到我同媽咪講韓文,因為佢哋唔識聽,就問『你媽媽係新移民嚟㗎?』」即使去到韓國,韓國嘅親戚都會問,「香港有冇西瓜呀?食多啲西瓜啦!香港有冇柑呀?食多啲柑啦!」對於當時只係小朋友嘅Jade,根本唔識答,「只係覺得好煩囉!」
empty
Jade細個覺得自己係怪胎,無論香港朋友定韓國親戚都會問佢奇怪問題。
empty
直至大長今嘅出現,先令佢為自己擁有一半韓國身份感自豪。
雖然Jade喺香港長大,亦離唔開韓國文化。例如過年,香港人會去親戚屋企拜年,但Jade就要跟媽咪周圍去拜神,「我最記得有一年大年初一,媽咪叫我着韓服去黃大仙拜神,當年套韓服係橙紅色,周圍啲人都望住我!」佢話嗰時超級唔鍾意,超級尷尬!

小學時期,都有試過被取笑,嗰時學校除咗Jade係港韓混血兒,仲有個港日混血男生,「我記得細個同嗰個男仔打交,畀老師罰企,其他老師行過就話,『嘩!做咩呀?日韓大戰呀o依家?」Jade話嗰時真係覺得好肉酸!
empty
大長今後K-Pop都開始彈起,有次Jade識朋友可以到後台同Rain合照。
empty
Jade話韓國親戚住嘅屋都好似畫中畫嘅模樣。
直到Jade 15、6歲,玩一個韓國社交平台,該平台嘅特色係每日會隨機抽選用戶作介紹。有一次Jade被選中,平台介紹佢係「懂得五國語言的香港韓國混血女生」,點知就收到韓國網民嘅惡意留言,內容係「香港韓國呢啲唔係叫混血,係叫國際婚姻呀!」Jade話「國際婚姻」係對其父母嘅侮辱,因為韓國人所指嘅國際婚姻,係30歲以上嫁唔出、娶唔到老婆嘅人,要喺落後地區例如越南,買個老公或者老婆返嚟。

細個面對咁多港韓文化差異,Jade唔係太鍾意自己係半個韓國人,直至大長今嘅出現,先由令人奇怪變成令人羨慕,「大長今播出之後,越嚟越多K-Pop歌手出嚟,當啲人知道我係港韓混血兒就會話,『吓?你係韓國mix嚟㗎?嘩!好勁呀!咁你咪識講韓文囉?』」
喺榨菜同泡菜之間,Jade話唔可以唔食泡菜,不過講到做人,就話想做香港人,「始終喺香港長大,鍾意香港文化多啲,唔係好鍾意韓國嘅階級觀念,即係我大你一年,就叫你做乜你都要照做。」

Jade又話唔習慣韓國男人嘅大男人性格,所以如果喺港韓之間揀另一半,都希望揀返香港人,唯一只有一個要求,「我會好夢寐以求一個韓式婚禮,男朋友係咩國籍都要着韓服!」

Jade Chin Blog
https://www.facebook.com/jadechinblog

場地提供:狎鷗亭居酒屋
地址:尖沙嘴諾士佛臺9號冠福中心1樓
電話:35792992

記者:鄒倩婷(阿仙)
攝影:峰 Neo
剪接:Roy
編審:陳家文