林鄭噚日連踩西貢同觀塘兩場區議會政改諮詢，中午時間亦不忘「洗酒樓」，去咗觀塘apm一間酒樓派政改單張，官方facebook相片所見，林鄭落區時極受歡迎，不論阿婆阿伯、師奶阿叔都上前合照，但原來事實並非咁簡單。
喺呢間酒樓附近返工的梁小姐就向八方爆料，噚日如常去呢間酒樓飲茶時，酒樓方面話有人訂咗廿五張枱，佢又見到現場唔少人唔係飲茶，而係set定相機等影相。

過咗約五分鐘，梁小姐就見到林鄭等政府官員殺入酒樓，先知原來有親政府團體一早喺酒樓訂枱，梁小姐懷疑有人幫林鄭搭定台，等林鄭行過時有好多茶客話「好支持你」、「政改好好」等等。
不過正所謂天網恢恢、疏而不漏，個幾月前已喺呢間酒樓訂枱，同班同事食開年飯嘅白鴿黨議員胡志偉，就撞正呢一幕，佢哋有人又咁啱有黃傘喺手，於是即場高舉黃傘高叫「我要真普選！」獲現場約五枱真正街客拍掌讚好，但就被做媒人士叫佢唔好「搞搞震」，志偉事後慨嘆：「林鄭要靠啲媒嚟壯膽，難怪話對政改不感樂觀啦。」
除咗觀塘，林鄭月娥噚日喺西貢區議會亦都遇上泛民議員黃傘陣示威，佢哋一邊高喊「我要真普選」，一邊離開會議室，林鄭就未等佢哋完全離開，就開始發言，完全當冇事發生。