陳展鵬、單文柔早前公佈下月婚訊，早前更一齊以「準夫妻」檔，現身活動賺快錢，當時陳展鵬笑稱：「稱呼上唔同咗囉，不過唔關我事嘅。」單文柔就話未習慣大家叫佢做陳太同陳師奶，陳展鵬話：「師奶殺手好吖，啱我呀！」

陳師奶真係怕醜咗啲，其實兩人早就共賦同居啦。上周四，一對準新人已遞交「擬結婚通知書」，入紙後三個月內註冊。通知書上，寫上兩人個人資料、職業及住址，兩人均填上西貢大網仔路。

今年六月，陳展鵬捲入「租霸」風波，現租住西貢大網仔路逸瓏園。其實呢位視帝早於03年曾購入藍田匯景花園單位，但多年來卻愛租樓。去年陳展鵬以母親名義，斥資1,280萬購入將軍澳新盤晉海高層全海景單位，實用面積約700多呎，三房間隔。早前有報道稱兩人婚後應搬入晉海，唔再租屋住喇。

陳展鵬一向都係個有部署嘅人，就連骨灰龕位都大手掃十個（新聞連結： https://bit.ly/2NI5Ck0 ），報道更指為未婚妻諗好晒一切。細心若此，相信兩人新居亦定必有驚喜。

精選娛聞，喺晒《娛果》：
http://fb.com/appledailyent