其實鄭嘉穎一向低調,當日佢選擇峇里舉行婚禮都係貪當地私隱度高。而婚禮宴請嘅賓客亦係同嘉穎好相熟嘅圈中好友。佢哋事前個個都守口如瓶,唔敢透露半句婚期、地點同細節,可見鄭嘉穎保密功夫真係做足。
而最近另一對娛樂圈新人陳展鵬同單文柔,亦因為之前遞交「擬結婚通知書」,令佢哋同居關係曝光。佢哋宣佈下個禮拜六先擺酒,不過之前佢哋交「擬結婚通知書」時就報咗同一個地址。不過,問番展鵬同女友係咪同居試婚時,佢就避重就輕話︰「𠵱家乜嘢年代呀?呢個係幾好嘅題材,將來可以攞嚟拍,我哋𠵱家好舒服、好自然,大家唔好聯想太多嘢……我冇留意呢單新聞喎,不過只係一個地址,用嚟登記啫。」
撰文:馮仁昭