解放軍成日自吹自擂軍紀嚴明，但原來駐港部隊毫無紀律，前日唔知有冇命令之下，竟然可以「自發」走出軍營，當《基本法》同《駐軍法》如無物，咁下次如果想刺激香港消費市道，佢哋又會唔會「自發」出軍營去shopping？仲搞到好多人質疑，係咪又可以「自發」走出軍營，拎住槍止暴制亂？

「雪楓旅」純屬T款？

出師無名在先，佢哋着出來嘅衫仲嚇人，除咗有人着美帝牌子Under Armour，有傳媒仲影到佢哋着住件有「特戰八連」同「雪楓特戰營」字樣嘅波衫，有大陸傳媒事件解讀，話「雪楓特戰旅」公認係解放軍「最強反恐特戰隊」，唔通已經當晒示威者係恐怖分子？

老友就同八方講笑，唔少軍事迷着嘅tee上面都印住「Navy SEALS」字眼，唔通又係美軍海豹部隊咩？反而真正嘅特戰人員好低調，唔會公開自己屬邊個部隊。不過亦有政圈好事之徒話，就算呢班自發軍係特戰人員，但老解出特戰人員去執磚清路障？難道老解冇其他軍人可用，定係啲磚真係好危險，所以要出老解「最強反恐特戰隊」執走佢？亦有人講笑話，今次出「最強反恐特戰隊」都有一個好處，就係令香港市民知道，老解佢哋除咗摺被世界第一，原來執磚都一樣頂呱呱，而呢個特戰技能，睇怕仲可以傲視全球囉、冇乜其他特戰隊同佢哋爭呢個No. 1喇。

李八方