應屆出爐港姐馮盈盈喺當選後被揭喺fb連環爆粗鬧政府，雖然事後佢已經好官腔話明白當選之後，喺生活上嘅言行舉止更加小心更加注意，不過有啲嘢，唔係話改就即刻可以改，好似今日佢同港男冠軍黎振燁喺九龍灣出席活動，盈盈接受訪問嗰陣，拎咪嗰陣衝口而出話：「試咪、試咪，盧海鵬試咪！」

唔知係咪見到大家呆咗一呆，盈盈就話自己唔知講完呢個句之後，第二句就係爆粗，佢好緊張兼面紅紅話：「冇喇，冇喇，剩係試咪，冇下一句，我唔係講起粗口兩個字就驚，但會小心啲。」睇嚟呢個港姐光環仲勁過金剛圈，扮唔識不失為上策！

講到師姐麥明詩開腔力撐，盈盈話大家私下有聯絡，對方仲分享咗唔少經驗之談：「佢叫我當選後要識用乜嘢態度去面對新聞，好似似嗰陣佢有好多負面批評，畀人鬧離地，所以叫我要學習睇開啲，做好自己。」再問佢有冇諗過做貼地港姐？盈盈話：「我有好多朋友嘅意見都覺得我好貼地，我本身都係咁嘅樣，冇話特別塑造呢個形象，我對住啲新聞都睇得好開，有時喺另一角度睇都幾好笑。」

之後盈盈話依家仲未拎到真正嘅后冠，佢話：「佢哋話基於安全理由，要遲啲先可以俾我哋，我都想快啲拎到手。」至於會點收藏，佢話：「依家呢個后冠用完會擺喺蛋糕盒，最危險地方就係最安全，如果收到個真后冠，我可能將佢連埋蛋糕盒再擺入雪櫃。」