跳舞老師Mannix睇住個MTV，一陣已經學會，然後即場教人跳，「呢隻舞嘅動作好簡單，基本上四、五歲細路仔都做到。加上基本舞步只有四招，比起ParaPara、Macarena容易得多，跳出嚟又有拉丁舞嘅熱情奔放，能夠發揮一個人嘅性感味道，應該好啱𠵱家咁強調自我個性嘅後生仔女！但係呢隻舞好快，要跳得好，一定要feel真佢嘅節奏，至可以發揮自己嘅神髓，可以話易學難精！想憑佢出位，都要下啲苦功！」
邊印腳邊抹枱 跳舞好Easy
曾經學過HipHop嘅Harley大概用咗個零鐘已經掌握舞步，就膽粗粗上台表演，「音樂好輕鬆，好容易記得，又好夾呢啲咁『悠』嘅舞步，係咁抹係咁搖吓就OK，比我過去玩過嘅任何一種舞都容易，估計佢會比ParaPara流行，因為無咁多嘢要記！」大學生Vivian：「我最鍾意一路印腳，一路抹枱嘅動作，好好玩！而且大部份動作都要擰腰擰Hip，全部都要有力，我覺得重可以用嚟KeepFit！」學跳Jazz嘅阿Ray：「佢好簡單，但係就令我覺得好自由奔放。」其實，高難度嘅Hip-hop都興咗咁耐，或者係時候興啲人人啱玩嘅新嘢喇！