由9月4日高位25362點計，恒指約一個月累跌2,000點，期間能夠力保不失，已算萬幸，能夠逆流而上嘅，更加值得尊重。中期業績交足功課嘅東江集團（2283），一個月累升兩成，絕非池中物。
東江主要業務為模具製作及注塑組件製造，產品用途廣泛，由手機、數碼設備、醫療器械，到家電、彈珠機及汽車等，可謂一應俱全。截至6月底止，中期收入增長12%至5.3億元，盈利更增長37%至5,309萬元。業績後連環公佈收購，包括以1,200萬元一間跨國公司嘅製模附屬，另又以255萬元，收購德國同業。後者金額不大，卻極具策略意義，皆因今次落戶德國，對擴充歐洲版圖有莫大幫助。建銀便預期，透過今次收購，東江有機會奪得福士定單！成事的話，肯定不得了。公司淨現金達2億元，收購彈藥十足。