【中環儷人】何慕詩由主持轉行做性治療師 爆十年行醫有藝人求診
性上癮十年張致恒性治療師何慕詩中環儷人
已做了十年性治療師的何慕詩(Cynthia),這位中環儷人,轉行前曾活躍幕前,2000年做過無綫節目《全線大搜查》主持,其後更跳槽亞視,2002年做《六合彩》主持,不過,演藝事業並沒給她前景,06年毅然決定報讀悉尼一個「性健康輔導治療」碩士學位課程,花上三年時間,Cynthia做了性治療師,在港執業。
Cynthia回想當年的決定,竟然受到影后鮑起靜啟發,「人成長到某一個程度,就會諗吓自己將來,都做咗artist好多年,開始睇自己,可唔可能似鮑姐咁,做一個好受歡迎嘅甘草?應該有一段距離,artist工作好多嘢未必控制到,人哋搵唔搵你,你有冇咁嘅運。我人越大,交際應酬越弱,機會就話自己爭取,但我保證唔到當我老咗,人哋仍覺我好OK,我就諗如做唔到鮑姐咁,我可以做啲乜嘢。」轉行導火線是Cynthia某次返內地公幹,獲主辦單位熱情款待,席間被一名內地老闆要求喝酒,她表明自己身體狀況不宜飲酒,酒精入血會致命,「我以茶代酒,對方仍叫我飲一半酒,我飲一啖都死,仲話要一半,我唔會為呢個工作喪命。對方即黑面拍枱,問我係咪唔畀面,如果我飲得唔通想將自己擺喺咁尷尬位咩,好彩導演幫我解圍,但成晚餐飯都尷尬,我飲唔飲酒自己決定,點解要俾人迫。」
有學識的Cynthia決定即使轉行,也要成為一個專業人士,目標明確的她最終揀了做性治療師:「全部成年人都好需要sex,有問題的人亦好多,好多人歸咎『年紀大機器壞,有問題就梗啦』,覺得唔需要去處理,但如果處理得好,唔一定會發生年紀大機器壞。以前啲人唔知點去解決,或者唔想去解決,又或怕醜唔敢講,想解決都解決唔到,我哋呢行就畀到佢哋出路,性事問題其實等同傷風咳,有病咪去睇醫生,好多時心理因素影響較多。」
Cynthia的病人由15歲到70歲不等,男女各半,她說:「唔同年齡,唔同階層,當然都有藝人。」病人最小是僅15歲少男由母親陪同求診,Cynthia說:「男仔同父母表達佢性取向,爹哋抗拒唔肯傾,媽咪想深入了解,佢想我幫佢將囝囝由攣拗番直,我有責任向家長解釋同性戀者心路歷程,令家長明白當事人都承受好大壓力,家人如唔接受,囝囝只會更辛苦同唔開心。」
近日張致恒(Steven)公佈奉子成婚,同時爆出一腳踏五船,也被翻舊帳曾自爆疑有性上癮,Cynthia說:「性上癮呢個病幾普遍,係男仔居多,約佔80%,男士點解會性上癮,要追溯返佢係咪有嘢唔開心,可能有啲人因為一時唔開心,召妓發洩,而佢enjoy減壓,越去越密,咁樣令佢慢慢沉迷,我哋都要睇番佢嘅癮有幾深,有冇得戒,畢竟係成年人,想唔想戒冇得迫,如果因為成癮影響到自己生活同工作,或者佢自己覺得好攰,好辛苦,俾心癮牽住,影響到自己就要正視,如身邊冇人迫,冇施加壓力,自己又感受唔到呢個問題,佢自然抗拒唔會嚟睇。」Cynthia指從未接觸過Steven,未能深入分析他的情況:「係咪性上癮,要佢本人先知。」但若有伴侶患有性上癮,Cynthia勸喻:「兩人私下比較難自己解決,每對情侶間都有一個特定相處模式,要肯跳出框框先有新嘅改變,最好有我哋幫手。」
Cynthia做了十年的性治療師,「睇過嘅病人,數千一定有。我每日睇症6小時,全程要好集中精神。」Cynthia說:「完全冇後悔轉呢行,好開心行咗呢條路,幫咗好多人,令佢哋開心番、舒服番,滿足感好大,同做藝人完全唔同。我敢講我一日唔死都仲會繼續做性治療師呢份工,越累積多啲經驗,人哋對我越信任,冇退休年齡限制。」Cynthia坦言仍有戲癮,偶會客串演出扮演性治療師或心理醫生。
------------------------------
【每周送10萬】
升級壹會員獨家尊享,立即參加
10萬火急大抽獎 !
*推廣生意的競賽牌照號碼:52302-9