《色慾都市》（SexandtheCity）咁受女性觀眾歡迎，原因係四個性格同「性」格迥異嘅女角，成為唔少女性同佢哋身邊姊妺嘅投射，對於電影版中女主角有情人終成眷屬呢個ending，亦引起八方唔少女性朋友極大嘅迴響。唔知係咪想食正呢個潮流，公民黨噚日公佈，黨魁余若薇（Audrey）、陳淑莊（Tanya）同容詠嫦（Amy）亦有所「歸宿」，呢三個時代女性將會合組一張「全女班」名單，出戰港島。
《色慾都市》嘅Carrie係時裝精，現實中嘅Audrey除咗打官司叻，一早有「民主女神」綽號之外，亦都以識着衫見稱。前日香港著名時裝設計師鄧達智就喺電視台嘅節目中，特別點名提到Audrey，話佢嘅衣着為佢參選時增加唔少分數，叫啲有意從政嘅政壇新秀一定要學吓呢位咁有時裝觸覺嘅議員。

代表不同女性

至於陳淑莊，佢除咗係Audrey嘅愛徒之外，仲曾經參演舞台劇《東宮西宮》，扮演「Miss嘟」。佢喺劇中用咗7分5秒，就將全長2,782字仲夾雜咗好多個「嘟」字喺裏面嘅台詞一口氣讀完，牙尖嘴利。Tanya除咗有「公民黨周迅」稱號之餘，仲要喺山頂選區擊敗自由黨主席田少力捧嘅區議員，真係少啲實力都唔掂。
至於望落比較成熟嘅Amy，原來年輕時成日俾人話似歌星陳秋霞。而身為離島區議員嘅佢，最出名一役，要算係成功監察大發展商同大財團，令到審計署要政府向愉景灣發展商追地價。Amy近排仲已經放棄咗外國國籍，比起嗰班唔俾人又迫又鬧都唔放棄外國護照嘅副局長同政治助理，至少政治智慧高一皮。
Audrey噚日話，佢哋今次「全女班」出選，代表晒高、中、矮嘅女性。身高五呎九吋嘅Audrey，當然係最高嘅一位，Tanya就中等身形，Amy最嬌小玲瓏，所以近排特別買咗對厚底運動鞋，諗住嚟緊周圍拉票時方便走動之餘，亦可以「自我提升」一下。可惜佢哋唔搵多個拍檔，如果唔係就可以開拍套公民黨版嘅PoliticsandtheCity。

mailto:[email protected]