【明年開巡迴騷】為人生重新出發 楊千嬅:希望將作品帶到更遠嘅地方
楊千嬅巡迴演唱會
楊千嬅《My Beautiful Live楊千嬅世界巡迴演唱會》將會喺明年啟動,聽日會喺北京舉行記者會,日前千嬅為演唱會拍攝海報,講到今次演唱會,千嬅用咗一年時間去籌備,佢話:「上次係季節限定嘅倒數演唱會,今次係重新出發嘅旅程,所以叫『My Beautiful Live』。我覺得美麗人生,不單止係美好嘅事,而係包含人生唔同階段嘅失敗、唔完美,甚至乎係好差嘅景況。因為喺最差嘅狀況,我哋先會真正成長,累積智慧,用唔完美成就完美,活出燦爛人生。」
為咗迎接呢個新挑戰,千嬅要操fit體能,應付各地嘅氣候,佢仲話:「我好希望將自己嘅作品帶到更遠嘅地方,所以趁我仲有能力和熱情嘅時候開巡迴演唱會,我好鍾意冒險,好似當年第一次攞獎,喺台上話我嘅心口只係得個『勇』字,我會努力,將個勇字延續落去,希望大家集氣支持我,畀我Keep住呢條中氣跑得更遠!」
精選娛聞,喺晒《娛果》
http://fb.com/appledailyent