世界電信展下個月4號喺香港開波,工商及科技局噚日喺亞洲國際博覽館,接收咗200部由寶馬汽車(香港)有限公司送出嘅私家車,到時就會用嚟接載各國嘅政府部長同貴賓。
但如果講到啲私家車嘅實用性,今年就似乎大過舊年喇,事關今屆世界電信展揀咗去山旮旯咁遠嘅亞洲國際博覽館,比起舊嘅灣仔會展隔涉得多。估計到時有成6萬位嘉賓出席,包括150幾位各國部長高官,同埋600幾位跨國企業嘅管理層,真係少部車去接班貴賓都唔得。
今次電信展有北大人到,人大委員長吳邦國下個月嚟香港出席開幕,前綫劉慧卿噚日就喺立法會內會提出,要吳委員長見吓香港民選議會代表,聽吓民意,民主黨主席李永達仲話,要同吳委員長討論吓香港政制發展,交換意見。最後大會通過由內務委員會去信政府,要政府喺委員長訪港期間,安排大家見個面。不過八方估最後特區政府一定話,委員長行程好密呀、安排唔到時間,等下次喇!