噚晚徐小鳳就開咗第七場演唱會,喺唱完《順流逆流》之後,介紹咗兩個嘉賓出嚟,就係兩個特首,一個係現任嘅梁振英,同埋第一任特首董建華,兩個特首一出場,噓聲四起,小鳳姐話:「呢啲係全場觀眾送給你哋嘅歌聲,佢哋真係幾辛苦0架,為香港默默耕耘咗好多年,所以我哋俾掌聲多謝佢。」但係見到咁嘅情況,又點會真係有掌聲,現場當然係噓聲「萬」起,但係小鳯姐就話係「掌聲」,幫兩個特首解圍。
呢一件事發生咗之後,網民喺facebook熱烈討論,有讚有彈,當然比例就係彈嘅多好多啦,網民話:「佢哋係今晚污點,我噓689,隔籬個女人勁睥我!」但都有網民話:「喺演唱要俾面我哋偶像,大家要照顧小鳳姐嘅感受。」好似咁嘅罵戰不停發生。
其實《順流逆流》呢首歌介紹兩個特首出場,唔知邊個係「順流」,邊個係「逆流」呢?