內地兩會三月開幕，一班港區人大政協陸續上京接旨，美國駐港總領事唐偉康最近相當勇猛，做完電視台再公開致辭，話擔心中央侵蝕香港嘅高度自治，影響營商環境，又話近年香港經常重「一國」輕「兩制」，搞到外交部駐港特派員公署要向美領館提出嚴正交涉，今日離港上京嘅港區人大代表陳勇都鬧埋一份，佢向記者鬧足三分幾鐘，高喊「英國」要向香港人同全國人民道歉！

相關新聞：【香港大鑊】力數三「不幸」事件 唐偉康：存政治風險 美港關係勢受影響

陳勇義正辭嚴鬧爆「英國駐港總領事」近日嘅言論，佢絕非一時搞錯「美國」做「英國」，佢係連續三分鐘力數英國嘅不是，仲話英國歷任首相對香港嘅一國兩制評價好高，連蘇格蘭、愛爾蘭嘅領袖都提出要效法一國兩制，解決英倫三島嘅紛爭、脫歐嘅問題：「作為一個英國嘅外交官，更多應該為佢自己嘅祖國更多貢獻！」之後仲樂此不疲咁樣力數英國國內面對嘅問題，英國都唔會想外國干預。

陳勇到咗北京後，知道自己衰咗，就向傳媒指自己頭先喺香港「講錯咗」，搞錯咗英國同美國，故佢正式向英國駐港總領事道歉，仲話自己講錯嘢都會道歉，所以美國（佢終於講啱）駐港總領事都應該學佢咁，就自己不當言論公開向全港市民同全國人民道歉喎。

3月7日《動腦Q馬拉松》
一日玩11場 全日派22萬
12:30pm-10:30pm
Let's QQQQQQQQQQQ the money！
http://bit.ly/2ICO2Mb