呢期大賽日唔一定幾個超級大倉玩晒嘅，好多練馬師都默默耕耘，要分一杯羹，好似徐雨石咁，呢朝就好積極喇，先喺機坪捉住莫雷拉，對住雷神指手劃腳傾唔停，擺到明向佢教路，教佢點發揮禮拜日隻「盤滿鉢滿」，呢匹馬剛戰跑第二，只係輸條頸，今次飛甩梁家俊改配莫雷拉，機會當然大增啦。除咗莫雷拉，呢朝阿石哥亦主動搵巫斯義傾「喜利高」嘅戰略，呢隻馬唯一建功一役，正正就係配巫斯義角逐今次嘅四班田草1600米，睇番今場「喜利高」嘅對手唔算太強，阿石哥又咁緊張，相信佢期望應好高！