紅曾遠在委內瑞拉，掟低兩句說話，當堂好似吐咗口水，引致董團夥及特區口水界人士，紛紛執住把放大鏡，研究紅曾口水裏面有幾多維他命同礦物質！
紅曾話：「咁你日日要平反六四，結束一黨專政，又點樣溝通呢？」不過跟住紅曾又話：「香港係多元社會，有不同意見係正常」，咁要求平反六四，係一種言論及意見，基本法亦列明有集會自由，有邊一忽破壞咗「人和」？
至於「結束一黨專政」，亦唔同「結束共黨專政」。結束一黨專政，只係叫共黨唔好一個霸住成枱飯菜自己獨食（咁獨食顧住膽固醇）！而係開放反對黨，畀第啲政黨公平參選，由選民決定呢五年畀人哋食，過多五年，政府換屆，又可以畀番你食！
咁嘅不同意見都不容，點樣「社會多元化」？即是話係神係鬼都任由佢一把口講晒，呢啲咁嘅口水，愈研究，個人愈會黐線！