章子怡自從15年12月為汪峰誕下女兒醒醒(暱稱)後,就一直喺美國專心湊女,轉眼囡囡醒醒都已經一歲半喇,噚日章子怡都已經低調咁喺洛杉磯低調復工喇!
噚晚有大陸雜誌嘅編輯喺微博到貼咗章子怡復工嘅相,相信子怡係替該雜誌拍攝封面,見到章子怡着住黑色嘅長裙,佢就坐咗喺地上同一班工作人員影大合照,坐佢身邊嘅就係汪峰同前妻葛薈婕所生嘅女兒「小蘋果」,子怡就一手竪起姆指,一隻手就搭住小蘋果,可見佢都好愛錫呢個繼女,連開工都帶住佢,但唔知小蘋果可知道身在大陸嘅媽媽因涉毒而被扣查呢!(新聞連結: http://bit.ly/2amBoO9 )
而有網民見到章子怡復工,都大讚佢保養得好好,亦有網民話之前嗰日先見佢攞住小蘋果嘅結他陪囡囡醒醒玩,突然就復工,有啲難以置信喎!據知,子怡除咗幫大陸雜誌影相之外,之前都有報道話佢將會拍攝荷李活嘅科幻電影。
另外,「小蘋果」嘅親母葛薈婕日前就喺大陸某醫院滋事後,被驗出涉嫌吸毒,被行政拘留。有網民就翻查紀錄,話佢早喺2014年,就有人質疑過佢吸毒,但當時佢就喺微博到叫網民搵警察去拉佢,仲話可以驗尿同驗髮都得,今日網民就話佢自己打自己嘴巴喇!