當年今日
關於我們

中環在線:e-KONG衛斯文要贏電盈 - 李華華

蘋果日報 2007/05/15 00:00


電盈早輪先至公布取消美國預託證券(ADR)嘅上市地位,原因係交投少,皮費高,索性摺埋好過。言猶在耳,佢嘅宿敵K寶噚日又話董事局已批准撤銷ADR喺納斯達克股票市場嘅上市地位,唔通真係咁蹺。
K寶發言人話,考慮到股份交投量有限,要維持上市地位須投入時間同成本,每年要使幾百萬港紙,於是申請撤銷上市,預計下個月8號生效,即有線ADR最後交易日會係下個月7號。
另外,K寶姊妹機構九倉電訊今日賣廣告,話電X盈科嘅商業電話線月費加幾多,九倉就減更多畀你,實行對着幹。
而另一邊,曾經湊大和電同Sunday、現任e-KONG主席嘅衛斯文,亦以電盈為目標,實行追住唔放。佢自誇公司會好小心進行收購,務求每階段都有錢賺,幾年後業務規模肯定過百億,大過8號仔電盈。佢仲話班地產佬踩入電訊界無非為面子,搞唔掂真丟架。