韓流天王Rain主演嘅新劇《回來吧大叔》將於本月26號首播，前日Rain先喺香港亞博館開騷，佢施展渾身解數，喺台上勁歌熱舞，又除衫騷肌誘粉絲，而喺騷上Rain就話會逗留香港多一日，又自爆好想再食雞蛋仔，搞到唔少粉絲都期待喺旺角能偶遇Rain，不過原來Rain就冇留多香港一日，原本佢今日下晝先離開，但佢噚日就提早離港，並於噚晚深夜就上咗機，由於佢臨時走，所以都唔見有粉絲成功送機。

唔知Rain咁急返韓國係唔係因為要趕拍新劇《回來吧大叔》關係，而佢今日凌晨就上載咗一張佢拍緊新劇嘅現場照，似乎佢一落機就即刻撲去開工，照片中Rain戴住眼鏡兼身穿西裝，畀人感覺好專業咁，睇嚟Rain對於今次新劇好緊張，所以即使咁頻撲佢都即刻返去韓國進行拍攝。