入行20年，莫文蔚（Karen）嚟緊9月中會喺中環一個購物商場，舉行個人展覽。今日Karen抽空到新城接受訪問，睇住佢大嘅薛家燕，仲送上女兒紅，寓意呢個囡囡越嚟越紅。

講番個展覽，佢話：「好彩自己鍾意儲嘢，所以留番好多珍貴物品，不過就放咗喺媽咪度、自己屋企同寫字樓，呢排都不停去搵，仲畀我搵到我三歲時，公公幫我錄底嘅卡式帶。」展覽將會展出佢當年全裸唱片封套尚未曝光嘅相，兼且電影《食神》中嘅假哨牙。

問佢有冇戴副假哨牙畀老公睇？佢話：「梗係冇，我整理啲嘢時佢唔喺香港。」嚟緊佢會將呢批珍藏品出書，兼且十一月喺上海開始巡迴演唱會，到明年三月嚟到香港紅館。