講到本月表現，兩位馬主鄭鍾華同鄭鍾偉兄弟，就直頭六月之星，雖然「一言為定」久未出頭，但鄭鍾華另一駒「準備就緒」贏完又贏，連埋鄭鍾偉勝出「沙池王子」，兩人眨眼已執三場，今期「一言為定」、「沙池王子」拍住上，鄭氏兄弟同方仔攬頭攬頸鏡頭，話唔定話咁快又再出現。
事實上鄭氏昆仲多年來季尾都特別旺，鄭鍾華之「一言為定」及「馬玲瓏」早年開齋係六月，鄭鍾偉隻「好心情」早少少都五月破蛋，運氣話嚟就嚟。好似隻「一言為定」自2011年初第四捷後，一路靜到家陣，但鄭鍾華與方仔都冇放棄，所等不外再入凱旋門呢一日；至於「沙池王子」上賽之前停了九日課，都贏得咁瀟灑，今次正常番晒，方仔爭冠軍都睇佢喇！