最近翁靜晶接受有線電視節目訪問，講番當年陪伴亡夫劉家良抗癌嘅日子，仲有佢自己點樣走出喪夫之痛。近年，翁靜晶積極參與佛寺義工，免費為寺廟提供法律援助，又籌募修葺經費，亦係同劉師傅離世有關。

面對死亡，一般人會因為驚而唔講，但係恩愛多年嘅翁靜晶同劉家良，就選擇積極面對癌魔，冇避忌咁傾身後事。翁靜晶話：「喺佢彌留期間，我已經同佢商量好身後事，當時佢堅持要火葬，要辦得風風光光。我去睇咗好多棺地，影晒相畀佢揀，仲試瞓過棺材，希望揀個最舒服嘅畀佢。」

佢又話兩個人相處一向百無禁忌，仲曾經同劉師傅開玩笑指：「你睇嚟咁精神，如果你唔死，我哋就可以賣啲棺地出去賺一筆。」

翁靜晶一直以「快樂人」身份支持老公抗癌，但佢坦言老公離世曾令佢崩潰：「當時我好唔捨得，攬住兩個女，想同爸爸一齊離開。」

正當佢想尋死一剎，收到寺廟嘅電話，建議佢搬去暫住，嗰段期間，佢思想平復咗，本來想打算退休，但機緣巧合下，佢接受咗定慧寺嘅邀請，幫寺廟籌募修葺經費，希望將對老公嘅愛延伸至其他人。