體重超過220磅，如果想玩足球，我求大俠諗美式足球會啱過英式足球好多，而相信巴甲老牌球會哥連泰斯嘅理念亦同我求大俠一樣，所以佢哋喺前日提早終止咗同前巴西球星阿祖安奴嘅合約。
30歲嘅阿祖安奴原本同哥連泰斯嘅合約喺今年6月先至屆滿，但哥連泰斯就提早斬纜，仲喺聲明中講到明，係因為無法再忍受呢名巴西前鋒嘅「不專業」；睇落好似好絕咁，不過，實情係阿祖自己唔生性。阿祖喺效力意甲國際米蘭時，雖然一度顯現出巨星風采，代表巴西參加2004年美洲盃及05年洲際國家盃，都成為賽事嘅神射手；可惜，佢暴飲暴食又爛蒲，結果喺歐洲冇人要，搞到喺2011年回流返巴西加盟哥連泰斯，簽約一年。

哥軍出盡法寶助減肥無效

不過加盟哥連泰斯後不久，阿祖就操練受傷要休息6個月，而佢喺呢段期間就更加放縱自己，據報體重標升至200磅。傷癒復出後，阿祖依然唔自愛，成日缺席球會操練兼多次觸犯球會紀律；不過哥連泰斯都冇放棄佢，相反仲諗盡方法去幫佢減肥㖭，例如要阿祖一日操三課，食醫生開嘅減肥餐單，甚至將佢「軟禁」喺酒店，採取人盯人戰術實佢食啲乜。不過，呢啲方法一一無效。而喺上星期，阿祖又再次缺席訓練，仲拒絕畀隊醫幫佢磅體重（據悉應該係超過220磅），哥連泰斯今次終於忍無可忍，決定提前終止合同。
前哥連泰斯球星尼圖亦睇死阿祖被解約後，職業前途會係咁先：「我從不否認阿祖嘅才華，而且我同哥連泰斯嘅球迷都希望睇到阿祖發揮出色，帶領球隊創佳績；但現實係呢條友令我哋太失望喇，作為球員，佢太唔專業，從未出過一丁點嘅努力去爭取自己嘅未來；家，相信只有儍佬先至敢再簽佢。」