日本車書解說 《MagX》新本田Stream現形
蘋果日報 2006/04/07 00:00
老婆愛睇娛樂八卦雜誌，尤其係嗰啲鮮為人知的名人秘聞；我亦唔例外，但睇嘅會係車壇八卦消息喎！所以一行開日本百貨公司，就例必走入去書攤尋寶。日前，就俾我搵到新一期4月號的《MagX》，翻開一看，發現到本田新版7人MPVStream經已落實在今年6月上旬推出。從電腦圖中所預見嘅新款Stream，車身尺碼大咗一截，兼且來得平實一點，有啲似同廠Stepwgn嘅縮水拉長版。據知，新車後排會有全新設計，以擴闊空間之餘，就連尾窗的視野亦要來得闊落。至於新Stream嘅引擎編排，亦一如新Civic般以全新1.8公升引擎作主打，而頂級版為Stepwgn的2.0公升型號。如果部車嚟咗香港，等我都諗諗換車先得！
1系開篷車好矚目
雜誌後半部講乜？咪就係講緊呢期好Hit嘅寶馬1系，佢原來唔止有掀背型號，有消息話廠方經已喺歐洲多個地方實地測試寶馬1系開篷型號，預期今年9月會正式登場，若然有望明年引入本地的話，開篷車車迷又會多個好選擇。
記者：陳偉林
記者：陳偉林
■新版本田Stream個樣變得平實，但操控力會大大提升。
■尺碼適中的1系開篷車，未知會否增加車系的銷量。