【繼續扮四大天王】承認恨做爸爸 李思捷:Try My Best
李思捷何雁詩
李思捷噚晚喺九展舉行棟篤音樂會,請咗何雁詩做嘉賓,思捷除咗模仿四大天王唱歌,又扮譚詠麟唱腔,扮鬼扮馬唱歌之外,亦會同何雁詩合唱《來夜方長》,兼講下同娛樂圈有關嘅笑話,思捷話:「我唔會踩人,只係模仿人講嘢,講下黎明金句,學秋官扮下嘢,我唔會得罪人嘅,未試過指名道姓講一個人壞話。四大天王都做咗爸爸,黎明最近做咗爸爸,都會講呢啲。」
最近好多藝人做咗爸爸,思捷承認自己都好恨做爸爸:「梗係恨啦!但冇得計劃,要努力,我唔係後生仔,家庭放No.1,樣樣都要畀心機,係進行中,不過唔講得,要啱時間啱地方啱mood至得,try my best.」而噚晚係思捷媽咪生日,佢同現場觀眾唱生日歌為媽咪慶祝,問到幾時帶女友試媽咪啲手勢?佢笑話:「有機會,總之緣份啦!」有冇訂婚對像?佢話:「我冇黎明金句咁叻,不過我會努力。」
另外,何雁詩着住紅色外套,入面係一個黑色bra加短熱褲,幾性感,佢話:「外套夠大可以遮住,女人可以露少少,但唔好露晒,公司對我哋着衫冇限制。」男友鄭俊弘會唔會有限制?何雁詩話:「冇,佢對自己着衫都好隨意。」
精選娛聞,喺晒《娛果》
http://fb.com/appledailyent