陀住5個月身孕點跑800米？美國靚媽蒙妲露（Alysia Montano）就話你知做得到！周四美國田徑錦標賽，2012年倫敦奧運女子800米第5名、31歲跑手蒙妲露着上「神奇女俠」戰衣出戰女子800米第1組預賽，冒住攝氏43度高溫跑出2分21秒4，雖然喺小組只排第7、總排名第30無緣晉級，但表現已經贏盡掌聲！佢賽後亦要變身好媽媽，湊住着起「Strong Like Mom」T裇嘅囡囡Linnea接受訪問。

其實呢次唔係蒙妲露第一次大肚參賽，佢喺2014年胎住34周身孕跑出2分32秒13，今次「輕磅」咗時間亦快超過10秒。蒙妲露賽後坦言自己睇完電影《神奇女俠》後，決定毅然報名參賽，並視自己同神奇女俠一樣「為良善而戰嘅鬥士」，希望為全球婦女發聲：「整件事唔在於勝負而係過程。作為田徑選手，田徑場就係我嘅最佳舞台，我亦感到有責任為一啲缺乏安全平台嘅人們發聲。」