由藝訓班至今相識30年嘅吳啟華、陶大宇，20年前曾經合作經典劇《壹號皇庭》系列，兩老死近日再碰頭，合作拍攝鄧特希新劇《隱世者們》。噚日佢哋就同老拍檔宣萱，喺上水一個貨櫃場拍攝槍戰戲，喺劇中要同大宇床戰嘅宣萱，早排就話要積極減肥，噚日近距離目測，比之前佢又真係瘦咗啲喎！宣萱話佢係咁多位演員之中最嘆嘅一個，事關大部份場口都喺寫字樓拍攝，打打殺殺就交由男士們同後生女去負責：「套劇講我指派大宇佢哋做任務，臨尾佢哋雖然會調轉槍頭反抗我，不過就有趙碩之呢班後生女幫我去頂。其實我知蘇永康接劇本嗰陣都有投訴過，話後生時做法庭戲就多對白，到老咗先至嚟打！」

啟華：比無綫輕鬆

陶大宇就話雖然有埋身肉搏場面，但都叫做應付到：「啲打戲唔會好似甄子丹嗰啲嘅，不過劇組之前去馬來西亞拍攝，因為攞唔到槍牌，全程要打拳頭交，嗰吓真係又熱又辛苦！」至於吳啟華就話今次拍劇，比喺娘家嗰陣已經舒服好多：「𠵱家一日先一組戲，唔似得喺無綫要外景接廠景，多咗時間休息！」
撰文：馮仁昭